الحوراء تهتف بأبيها علي امير المؤمنين عليهما السلام

[فراس الحلفي]

بسم الله الرحمن الرحيم
اللهم صل على محمد وآل محمد والطيبين الطاهرين

زينب هالمسيه تصيح وين المرتضى الكرار
يبويه بلا ولي ظليت وشبت بالمخيم نار

يبويه امسه المسه عليه اندب يا علي وينك
ما تنهض يبو الحملات يبويه ذبحوا حسينك
يبويه اشلون هليله تنام وتستقر عينك
يبويه العايله فرت يبويه اخيام ما ظلت
مصيبه الابد ما مرت
وانته التحضر الشدات وبكل موزمه شنيار

زينب هالمسيه تصيح وين المرتضى الكرار
يبويه بلا ولي ظليت وشبت بالمخيم نار

يالمندوب بالشدات يا حيدر يداحي الباب
يبويه شيمتك تقبل بناتك تظل بين اجناب
يبويه فرهدونه اعداك يبويه وحركوا الاطناب
ما تنهض يا والينه تحرسنه وتحامينه
يزر ما ظلت علينه
وبيدي معصبي ونخاك احمينه يلتحمي الجار

زينب هالمسيه تصيح وين المرتضى الكرار
يبويه بلا ولي ظليت وشبت بالمخيم نار

بويه معصبي بيدي وحشمك يا فخر عدنان
يبويه للمداين جيت وبيديك ادفنت سلمان
يبويه ليش اخوي حسين عاري ايظل على التربان
يبويه اشعوكك عنه مع قرب المسافه النه
وتسمع للحرم حنه
يبويه وخوتي صرعه او بينه حايطه الاشرار

زينب هالمسيه تصيح وين المرتضى الكرار
يبويه بلا ولي ظليت وشبت بالمخيم نار

انته التكشف الغمه وانته البلظنك مندوب
وبيتك بيت ابو طالب عد كل العرب مهيوب
وانته الصممت خدري وبخدري المثل مضروب
يبويه اشلون اتيسر وشخصي للملا يظهر
واخاف من الفجر لو طر
ظلام الليل يتسرب ويكشف حالنه بنهار

زينب هالمسيه تصيح وين المرتضى الكرار
يبويه بلا ولي ظليت وشبت بالمخيم نار

يبويه والصبح لو صار يكشفنه ضوه انهاره
ولا ظل ستر يسترنه عن رؤيت النظاره
واخاف اعداك تسبينه سوي العيلتك جاره
يبويه بس حرم واطفال ما متعوده الهل حال
تنادي والدمع همال
حيدر يا علي ادركنه تتصارخ ازغار كبار

زينب هالمسيه تصيح وين المرتضى الكرار
يبويه بلا ولي ظليت وشبت بالمخيم نار

يبويه انهض وساعدني اريد ادفن اخوي حسين
واسوي مرقده ابكلبي واغسلنه ابماي العين
يبويه انته ادفنت عمار واصحابه بحرب صفين
او راعيت اليتاماهم وبيتك صار مأواهم
وتتألم المبجاهم
وتمنيت العمر يكضي من كالوا كضه عمار

زينب هالمسيه تصيح وين المرتضى الكرار
يبويه بلا ولي ظليت وشبت بالمخيم نار

[طالبة]

ﺗُﻠﺒِﺲ ﺍﻹﺑْﺪﺍﻉَ ﺣُﻠﻼً ﻣِﻦْ ﻋَﻘﻴﻖِ
ﺍﻟﺤﺮﻑْ ﻭﻧَﻔﺎﺋِﺲَ ﺍﻟﺘَﺮﻑْ
ﻓﻼ ﻋَﺪﻣَﻨﺎ ﻋﻄﺎﺋُﻚ