زينب تخاطب اخاها حامل اللواء ابا الفضل العباس عليه السلام

[فراس الحلفي]

بسم الله الرحمن الرحيم
اللهم صل على محمد وآل محمد الطيبين الطاهرين

زينب تندب اخوتها محتاره او بلايه معين
تصيح ابصوت دلوني ادرب العلكمي امنين

اريد اوصل لعد عباس واكله الوعد جا وينه
انه بديره غرب ظليت غيرك من يحامينه
طفلنه الجودك اعيونه وبسمك تلهج سكينه
من يثرب طلعت وياك جفيلي ومحمي بحماك
اذجرنك وجيت انخاك
ترضه يا كمر هاشم ومهظومه وتهل العين

زينب تندب اخوتها محتاره او بلايه معين
تصيح ابصوت دلوني ادرب العلكمي امنين

ماني اختك يبو فاضل وبسمي تنتخي بنخواك
طول الدرب ترعاني ما غفلت ابد عيناك
واخوتي المحملي حراس وعليه يرف الواك
وانته اتوزمت بيه العهد وينه يراعيه
اظل اشلون مسبيه
اشلون اهدأ يبو فاضل الفجيده انته وخوي حسين

زينب تندب اخوتها محتاره او بلايه معين
تصيح ابصوت دلوني ادرب العلكمي امنين

اخبرنك يبن حيدر شبوا بالمخيم نار
وفرت عيلتك بالبر تتصارخ ازغار اكبار
منهو اليلتزم بيها اشبصرك يبن حامي الجار
وانه مخدره تدري واغله من العمر سترى
للحك فوضت امري
اظل امحيره بالطف مهمومه وفجعني البين

زينب تندب اخوتها محتاره او بلايه معين
تصيح ابصوت دلوني ادرب العلكمي امنين

يخويه اكعد يبو فاضل وعلى الراي دليني
شنهو البصر والجاره اخاف اعداك تسبيني
ناصر ما بكه عدنه ولا واحد يواسيني
يخويه حيرتي حيره من دهري وتدابيره
عليه كصت هلديره
راوتني العذاب الوان هلديره اجتني منين

زينب تندب اخوتها محتاره او بلايه معين
تصيح ابصوت دلوني ادرب العلكمي امنين

انه اختك يبو فاضل واطلبك ريحة الخوه
ردتك تنظر لحالي وتشوف الدهري اشسوه
محنتي ما جرت عالناس ولا شاهدت هالبلوه
فكدت اسبعطعش مهيوب من اذكرهم دليلي يذوب
صبري اتجاوز الايوب
انه المحنتي محنه ورجح صبري على الثقلين

زينب تندب اخوتها محتاره او بلايه معين
تصيح ابصوت دلوني ادرب العلكمي امنين

يخويه من ثكل همي واشتدت علي بلواي
ودنياي اعصفت بيه وسفرت بالوجه لعداي
صحت لاوين ملجئنه ولمن يا نفل منواي
واحنه ابولية الظلام يساره ولبلاد الشام
وظلت بس حرم ويتام
ما تنهض يبو فاضل اعداك اعلى اليسر ناوين

زينب تندب اخوتها محتاره او بلايه معين
تصيح ابصوت دلوني ادرب العلكمي امنين

جاوبها بلسان الحال يبت حيدر اعذريني
حالت سنة الاقدار ما بينج او ما بيني
احمل بيش يختي السيف فكدت ايساري ويميني
لو جان الامر بيدي احقق كل مواعيدي
وما ظل وحده اعضيدي
الفاجد صحبته وكومه وبعدي ما بكاله امعين

زينب تندب اخوتها محتاره او بلايه معين
تصيح ابصوت دلوني ادرب العلكمي امنين

يخويه وحده اعضيدي علي اصعب شدايدها
اذا هجمت عليه الكوم يا هو البعدي ايصدها
وسكنه من تكلي الماي وينه شعتذر عدها
يوسفه افكدت ليميني وسهم الصوب العيني
وشمت بيه اليعاديني
وجسمي اعلى النهر مطروح وراسي منجسم نصين

زينب تندب اخوتها محتاره او بلايه معين
تصيح ابصوت دلوني ادرب العلكمي امنين

[كاظم الحاتمي]

بسم الله الرحمن الرحيم
والصلاة والسلام على اشرف الخلق اجمعين حبيب اله العالمين ، العبد المؤيد والرسول المسدد والمصطفى الامجد والمحمود الاحمد ، ابي القاسم محمد , وعلى آله الطيبين الطاهرين ، المعصومين المظلومين ، الاخيار المنتجبين الاطهار ، واللعنة الدائمة الابدية على اعدائهم اجمعين من الآن وفي كل آن الى قيام يوم الدين .
قل الابداع في حقكم ، وقل الاحسان لكم ، ولما كتبتم ، فانتم المتألقون دائما ، حياكم الله ، جناب الاخ العزيز والمشرف العملاق ، كبير الاساتذة ، جناب ( فراس الحلفي ) موفقين انشاء الله تعالى .

[فراس الحلفي]

بسم الله الرحمن الرحيم
اللهم صل على محمد آل محمد الطيبين الطاهرين

اخي وعزيزي المبدع المتألق المشرف اللامع (كاظم الحاتمي ) اخجل من التعبير القاصر بحقكم فلا اجد ما امدحكم واثني به عليكم لقصري عن بلوغ مقامكم الرفيع اسال الله ان يزيد بشرفكم ويوفقكم لمزيد من الخدمة الحسينية بحق الحسين