زينب عليها السلام تخاطب اخاها ابا الفضل العباس عليه السلام

[فراس الحلفي]

بسم الله الرحمن الرحيم
اللهم صل على محمد وآل محمد الطيبين الطاهرين

يلي نمت عالمشرعه مو ساعة النوم
هجموا يخويه اعلى الطنب من عكبك الكوم

اشعوكك يا ابا الفضل كل احنه نرجاك
وعيونه تربي الشريعه الخفكت الواك
شنكول انسيت الوعد يا خويه حاشاك
وسكنه تسلي للطفل بسمك يجيدوم


يلي نمت عالمشرعه مو ساعة النوم
هجموا يخويه اعلى الطنب من عكبك الكوم

عودك علي ضمك ذخر النه يمهيوب
واليوم يومك يا نفل يا صل الحروب
عندك سجيه من علي كشاف الكروب
وبشده من بعدك بكت زينب او جلثوم

يلي نمت عالمشرعه مو ساعة النوم
هجموا يخويه اعلى الطنب من عكبك الكوم

اتغذيت خويه المرجله من اهلك يصنديد
موقف الك بالكنطره اعداك اله اتشيد
اشلون ميهابك عدو وتمتد عليك ايد
وسيفك يخويه صاعقه وعلى العده ايحوم

يلي نمت عالمشرعه مو ساعة النوم
هجموا يخويه اعلى الطنب من عكبك الكوم

كطره ابحرك هالزلم كلهم يكونون
وكل الجحافل مسهره وما طبكت اجفون
اتهابك يطاعون الخصم اشحدهم يكحمون
وحدك يبو فاضل باسمك دوم ملزوم

يلي نمت عالمشرعه مو ساعة النوم
هجموا يخويه اعلى الطنب من عكبك الكوم

منهو الجسر خويه او تعده او جاز الحدود
ومنهو الخدش صرحك يخويه وانته الطود
الموت من اسمك يفر يا راعي الزود
يالتندب بالموزمه وتزيح الهموم

يلي نمت عالمشرعه مو ساعة النوم
هجموا يخويه اعلى الطنب من عكبك الكوم

اعداك هجموا عالخيم انهض يفراس
روعوا اطفال وحرم الماعدهم احساس
اشلون تهظمني العده وانه اخت عباس
يلبسمي خويه نخوتك احضرني هليوم

يلي نمت عالمشرعه مو ساعة النوم
هجموا يخويه اعلى الطنب من عكبك الكوم

انه الوديعه من علي عندك يلحنين
وصاك ابوي الحشمتي تطبكني بالعين
اوياك من طيبه اطلعت يبن الميامين
واعتب عليك ابمحنتي يا غالي السوم

يلي نمت عالمشرعه مو ساعة النوم
هجموا يخويه اعلى الطنب من عكبك الكوم

يكلها يبت حيدر علي خويه اعذريني
الاقدار حالت والامر بينج او بيني
افكد يميني او يسرتي او سهم البعيني
ويختي ابعامود الغدر الراس مجسوم

يلي نمت عالمشرعه مو ساعة النوم
هجموا يخويه اعلى الطنب من عكبك الكوم

[طالبة]

لقد تفننت ....... في رسم الصور والأفكار
بريشة فنان مبدع متفوق وماهر
أتمنى أن أكون جديرة.. وأنال شرف التعقيب
على هذه اللوحة الفنية
مبدع أنت ولكن ليس بالكتابة فقط
بل مبدع بحيث جعلتنى أدمن على مواضيعك..