تويت
| خلص گلب العقيله | من إجروح الثجيله |
| والجـروح أربعه إو شفرة مواضيها | إو مصيبة يا جرح زينب تداويها |
* * *
ساعد ألله گلب زينب أربع إجروح إشيلمها
إجروح مدميه إوثجيله إو تلهب إبجمرة سگمها
لو من الزهره صبرها بالصبر زادت عله أمها
| وإجروحها إلتنزف دمه | إبنار المصايب مضرمه | |
| يا جرح گلي إتبلسمه | إو يا گلب يحمل هضمها |
| هضيمتها هضيمـه | إو مصيبتها عظيمه |
| إو صبرها إليشرح إيهمها إو يواسيها | إو مصيبة يا جرح زينب تداويها |
* * *
هاك إخذ عن گلب زينب خبر وإتحمل مراره
إو شوف گلب الحره زينب ليش ما ياخذ قراره
إنجرح من ضلع التكسر جرح ما لإدواه چاره
| إومن عصرة الباب إنصدم | گلب العقيله إو ما سلم | |
| وإنصاب من محسن سهم | والسهم عندك أخباره |
| جرح واحـد ضهدها | إو شعل نار إبچبدها |
| إو صبرها إيخمد النـار إو يطفيها | إو مصيبة يا جرح زينب تداويها |
* * *
ما تگلي گلب زينب ليش حسراته ثجيله
جرح من سيف إبن ملجم أثر إبگلب العقيله
جرح ما ينشف نزيفه والگلب مينام ليله
| وإشلـون إبن ملجم جسر | إو صوّب إلميهاب الخطر | |
| إو خله إبگلب زينب أثر | والدمع فجر مسيله |
| لعـد زينب مردها | جرح ثاني وردها |
| إو أثر هذا الجرح من جرح واليها | إو مصيبة يا جرح زينب تداويها |
* * *
إشلون جرحين إبگلبها والگلب صابر ميجزع
إو بعد أخبرك جرح ثالث صابها إبيوم الموادع
حين شافت چبد أخوها الحسن بالسم إيتگطع
| يا جـرح گلي إتضمده | والگلب ألله إيساعده | |
| لو ما صبرها إيوادده | چان بجروحه توزع |
| كسر زينب دهـرها | إو يجابرها صبرها |
| إو هضيمة فاطمـه إبزينب معانيها | إو مصيبة يا جرح زينب تداويها |
* * *
آه يا جروح الثلاثه إو للگلب حرگت نميره
إو زينب إتشد إو تضمد وإبدواهن مستحيره
لاچن إمخدره إبخدر إلما إبهالعالم نظيره
| إو رابع جرح من كربله | صوّب گلبها إو مثله | |
| إنصابت وأهلها إمچتله | وأصبحت زينب يسيره |
| والجروح إبصدرها | تلذعها إبجمرها |
| تشب إو تنطفي بدمـوم أهاليها | إو مصيبة يا جرح زينب تداويها |
* * *
طابن إجروح الثلاثه إو بعد جرح الغاضريه
ما برح عن گلب زينب حتى وسدها المنيه
إو خزن إبگلب المصيبه والمصيبه العالميه
| ألله يا طف كربله | من عگـب الحسين إو هله | |
| إشسويت ويّه العايله | يالسبيت الفاطميه |
| إشعلت نـار إبنزلها | يساره إو روس أهلها |
| مشت للكوفه والشام إو تباريها | إومصيبة يا جرح زينب تداويها |
تعليق